main ne ibaadaton ko mohabbat banaa diyaa — Sarshar Siddiqui

ik kaar-e-muhaal kar rahaa huun
zinda huun kamaal kar rahaa huun

ujDe hain kai shahar, to ye shahar basaa hai
ye shahar bhi chhoDaa to kidhar jaaoge logo

niind TuuTi hai to ehsaas-e-ziyaan bhi jaagaa
dhuup divaar se aangan mein utar aai hai

naa-mustajaab itni duaaein huiin ki phir
meraa yaqin bhi uTh gayaa rasm-e-duaa ke saath

'sarshaar' main ne ishq ke maani badal diye
is aashiqi mein pahle na thaa vasl kaa chalan

miri talab mein takalluf bhi inkisaar bhi thaa
vo nukta-sanj thaa sab mere hasb-e-haal diyaa

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

sabhi se jab mohabbat chaahte ho
mohabbat kyon nahin karte sabhi se

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

sau fasaad ek ishq mein uTThe
boyaa ik tukhm uge hazaar darakht

kin manzilon luTe hain mohabbat ke qaafile
insaan zamin pe aaj gharib-ul-vatan saa hai