ibaadat khudaa ki ba-ummid-e-hur — Imdad Imam Asar

taDap taDap ke tamannaa mein karvaTein badlin
na paayaa dil ne hamaare qaraar saari raat

jab nahin kuchh e'tibaar-e-zindagi
is jahaan kaa shaad kyaa naashaad kyaa

dil na dete use to kyaa karte
ai 'asar' dukh hamein uThaanaa thaa

banaate hain hazaaron zakhm-e-khandaan khanjar-e-gham se
dil-e-naashaad ko ham is tarah pur-shaad karte hain

hasinon ki jafaaein bhi talavvun se nahin khaali
sitam ke baa'd karte hain karam aisaa bhi hotaa hai

dil ki haalat se khabar deti hai
'asar' aashufta-bayaani meri

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

maarka garm to ho lene do khun-rezi kaa
pahle shamshir ke niche hamin jaa baiTheinge