chaar jaanib chikhti samton kaa shor — Ishrat Zafar

mire aqab mein hai aavaaza-e-numu ki guunj
hai dasht-e-jaan kaa safar kaamyaab apni jagah

vo mere raaz mujh mein chaahtaa hai munkashif karnaa
mujhe mere ghane saae mein tanhaa chhoD jaataa hai

jidhar bhi jaataa hai vo shola-e-bahaar-sarisht
duaaein detaa hai amboh-e-kushtgaan us ko

chashma-e-aab-e-ravaan hai jo saraab-e-jaan mein
us ki har lahr mein raqsaan hai tarannum teraa

vo ik lamha jo tere qurb ki khushbu se hai raushan
ab is lamhe ko paaband-e-salaasil chaahtaa huun main

mire kamre ki divaaron mein aise aaine bhi hain
ki jin ke paas har shakhs apnaa chehraa chhoD jaataa hai

kyon tasavvur mein ji rahaa huun main
jab haqiqat mein mar hi jaanaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

main apni zaat ki tashrih kartaa phirtaa thaa
na jaane phir kahaan aavaaz kho gai meri

ek aansu bhi agar ro de to jaanun tujh ko
meri taqdir mujhe dekh kar hansti kyaa hai