marg-e-aashiq to kuchh nahin lekin — Jigar Moradabadi

ik lafz-e-mohabbat kaa adnaa ye fasaanaa hai
simTe to dil-e-aashiq phaile to zamaana hai

aatish-e-ishq vo jahannam hai
jis mein firdaus ke nazaare hain

aadat ke baa'd dard bhi dene lagaa mazaa
hans hans ke aah aah kiye jaa rahaa huun main

meri nigaah-e-shauq bhi kuchh kam nahin magar
phir bhi tiraa shabaab tiraa hi shabaab hai

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

un kaa jo farz hai vo ahl-e-siyaasat jaanein
meraa paighaam mohabbat hai jahaan tak pahunche

husn jalva dikhaa gayaa apnaa
ishq baiThaa rahaa udaas kahin

sunte hain ishq naam ke guzre hain ik buzurg
ham log bhi faqir usi silsile ke hain

ye pahlaa ishq hai tumhaaraa soch lo
mire liye ye raastaa nayaa nahin

apni talab mein shauq se jagte hain raat-bhar
ham ko kisi ke ishq kaa maaraa na jaaniye

charaagh-e-ishq badan se lagaa thaa kuchh aisaa
main bujh ke rah gayaa us ko havaa banaane mein

main vo maani-e-gham-e-ishq huun jise harf harf likhaa gayaa
kabhi aansuon ki bayaaz mein kabhi dil se le ke kitaab tak