bajaae gul mujhe tohfa diyaa babulon kaa — Kabir Ajmal

'ajmal' safar mein saath rahin yuun saubatein
jaise ki har sazaa kaa sazaa-vaar main hi thaa

main bujh gayaa to kaun ujaalegaa teraa ruup
zinda huun is khayaal mein martaa huaa saa main

ufuq ke aakhiri manzar mein jagmagaaun main
hisaar-e-zaat se niklun to khud ko paaun main

kuchh ta'alluq bhi nahin rasm-e-jahaan se aage
us se rishta bhi rahaa vahm o gumaan se aage

zamir o zehn mein ik sard jang jaari hai
kise shikast duun aur kis pe fath paaun main

ye gham miraa hai to phir ghair se ilaaqa kyaa
mujhe hi apni tamannaa kaa baar Dhone de

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

har zarra us ki chashm mein labrez-e-nur hai
dekhaa hai jis ne husn-e-tajalli bahaar kaa

haTaa kar phuul kaanTe hi bichhaa do
hamein chalne mein diqqat ho rahi hai

aasmaanon mein uDaa karte hain phule phule
halke logon ke baDe kaam havaa karti hai