usi ke honTon ke phuul baab-e-qubul chumein — Kabir Ajmal

zamir o zehn mein ik sard jang jaari hai
kise shikast duun aur kis pe fath paaun main

vo mere khvaab churaa kar bhi khush nahin 'ajmal'
vo ek khvaab lahu mein jo phail jaanaa thaa

kyuun baam pe aavaazon kaa dhammaal hai 'ajmal'
is ghar pe to aaseb kaa saaya bhi nahin hai

kahte hain ki uThne ko hai ab rasm-e-mohabbat
aur is ke sivaa koi tamaashaa bhi nahin hai

ye gham miraa hai to phir ghair se ilaaqa kyaa
mujhe hi apni tamannaa kaa baar Dhone de

kis se main un kaa Thikaanaa puchhtaa
saamne khaali makaan thaa aur main

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai

kab tak tu aasmaan mein chhup ke baiThegaa
maang rahaa huun main kab se duaa baahar aa

hijr ki shab naala-e-dil vo sadaa dene lage
sunne vaale raat kaTne ki duaa dene lage

ye naqsha hai ki munh takne lagaa hai muddaaa meraa
ye haalat hai ki surat dekhtaa hai muddai meri

mujhe dost kahne vaale zaraa dosti nibhaa de
ye mutaalba hai haq kaa koi iltijaa nahin hai

dil ki masjid mein kabhi paDh le tahajjud ki namaaz
phir sahar ke vaqt honTon par duaa bhi aaegi