baat niklegi to phir duur talak jaaegi — Kafeel Aazar Amrohvi

jab se ik khvaab ki taabir mili hai mujh ko
main har ik khvaab ki taabir se ghabraataa huun

tum ko maahaul se ho jaaegi nafrat 'aazar'
itne nazdik se dekhaa na karo yaaron ko

koi manzil nahin milti to Thahar jaate hain
ashk aankhon mein musaafir ki tarah aate hain

jaate jaate ye nishaani de gayaa
vo miri aaankhon mein paani de gayaa

ek ik baat mein sachchaai hai us ki lekin
apne vaadon se mukar jaane ko ji chaahtaa hai

us ki aankhon mein utar jaane ko ji chaahtaa hai
shaam hoti hai to ghar jaane ko ji chaahtaa hai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

maqaam-e-zabt gham-e-ishq mein vo paidaa kar
ki tu khushi ko na tarse tujhe khushi tarse

kitne gham hain jo sar-e-shaam sulag uThte hain
chaara-gar tu ne ye kis dukh ki davaa bheji hai

javaaz kuchh nahin hotaa hamaari khushiyon kaa
udaas rahne kaa koi sabab nahin hotaa