taalluq hai na ab tark-e-taalluq — Kamil Bahzadi

aakaash ki hasin fazaaon mein kho gayaa
main is qadar uDaa ki khalaaon mein kho gayaa

is qadar main ne sulagte hue ghar dekhe hain
ab to chubhne lage aankhon mein ujaale mujh ko

log bhopal ki taarif kiyaa karte hain
is nagar mein to tire ghar ke sivaa kuchh bhi nahin

kyaa tire shahr ke insaan hain patthar ki tarah
koi naghma koi paayal koi jhankaar nahin

aap daaman ko sitaaron se sajaae rakhiye
meri qismat mein to patthar ke sivaa kuchh bhi nahin

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

mire khvaabon ki chikni siDhiyon par
na jaane kis kaa but TuuTaa paDaa hai

khaak aab-e-girya se aatish bujhe naa-chaar ham
jaanib-e-ku-e-butaan juun baad-e-sarsar jaaeinge