barhami husn ko kuchh aur jilaa deti hai — Khar Dehlavi

chupke se sah rahaa huun sitam tere bevafaa
meri khataa to jab ho ki chuun kar rahaa huun main

chashm-e-giryaan ki aabyaari se
dil ke daaghon pe phir bahaar aai

mohabbat zulf kaa aaseb jaadu hai nigaahon kaa
mohabbat fitna-e-mahshar balaa-e-naa-gahaani hai

'khaar' ulfat ki baat jaane do
zindagi kis ko saazgaar aai

sach to ye hai ki duaa ne na davaa ne rakkhaa
ham ko zinda tire daaman ki havaa ne rakkhaa

main ne maanaa ki adu bhi tiraa shaidaai hai
farq hotaa hai fidaa hone mein mar jaane mein

ret par ik nishaan hai shaayad
ye hamaaraa makaan hai shaayad

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

aasmaan jhaank rahaa hai 'khaalid'
chaand kamre mein mire utraa hai

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi