koi halchal hai na aahaT na sadaa hai koi — Khurshid Ahmad Jami

baDe dilchasp vaade the baDe rangin dhoke the
gulon ki aarzu mein zindagi shole uThaa laai

pahchaan bhi saki na miri zindagi mujhe
itni ravaa-ravi mein kahin saamnaa huaa

zindagaani ke hasin shahr mein aa kar 'jaami'
zindagaani se kahin haath milaae bhi nahin

sahar ke saath chale raushni ke saath chale
tamaam umr kisi ajnabi ke saath chale

yaad-e-maazi ki pur-asraar hasin galiyon mein
mere hamraah abhi ghuum rahaa hai koi

chamakte khvaab milte hain mahakte pyaar milte hain
tumhaare shahr mein kitne hasin aazaar milte hain

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

mujhe ye Dar hai tiri aarzu na miT jaae
bahut dinon se tabiat miri udaas nahin

idhar to dard kaa pyaala chhalakne vaalaa hai
magar vo kahte hain ye daastaan kuchh kam hai