koi nahin jo miTaae miri siyah-bakhti — Khurshid Rabbani

dekh kar bhi na dekhnaa us kaa
ye adaa to buton mein hoti hai

kisi ne meri taraf dekhnaa na thaa 'khurshid'
to be-sabab hi sanvaaraa gayaa thaa kyuun mujh ko

tiraa bakhshaa huaa ik zakhm pyaare
chali ThanDi havaa jalne lagaa hai

havaa-e-taaza kaa jhonkaa idhar se kyaa guzraa
gire paDe hue patton mein jaan aa gai hai

kis ki khaatir ujaaD raste par
phuul le kar shajar khaDaa huaa thaa

khvaabon ki main ne ek imaarat banaai aur
yaadon kaa us mein ek daricha banaa liyaa

zamin jab bhi hui karbalaa hamaare liye
to aasmaan se utraa khudaa hamaare liye

apni apni gardish-e-raftaar puuri kar to lein
do sitaare phir kisi din ek jaa ho jaaeinge

fazaa mahdud kab hai ai dil-e-vahshi falak kaisaa
nilaahaT hai nazar ki dekhte hain jo nigaahon se

zamin paanv ke niche se sarki jaati hai
hamein na chheDiye ham hain falak sataae hue

bistar-e-khaak pe baiThaa huun na masti hai na hosh
zarre sab saakit-o-saamit hain sitaare khaamosh

main aur kitne sitaaron ko Dubtaa dekhun
siyaah raat ki kashti se ab utaar mujhe