yaqinan sochtaa hogaa vo mujh ko — Mahender Kumar Sani

darakht-e-zard mein jaise haraa saa rahtaa hai
vo Thiik usi tarah mujhi mein bharaa saa rahtaa hai

raushni mein lafz ke tahlil ho jaane se qabl
ik khalaa paDtaa hai jis mein ghumtaa rahtaa huun main

raat din gardish mein hain lekin paDaa rahtaa huun main
kaam kyaa meraa yahaan hai sochtaa rahtaa huun main

main tanhaai ko apnaa ham-safar kyaa maan baiThaa
mujhe lagtaa hai mere saath duniyaa chal rahi hai

divaar-e-khvaab mein koi dar kar nahin sake
ham log shab se aage safar kar nahin sake

main apni yaatraa par jaa rahaa huun
mujhe ab lauT kar aanaa nahin hai

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

jo hone vaalaa hai ab us ki fikr kyaa kiije
jo ho chukaa hai usi par yaqin nahin aataa

main sochtaa huun magar yaad kuchh nahin aataa
ki ikhtitaam kahaan khvaab ke safar kaa huaa

umr jitni bhi kaTi us ke bharose pe kaTi
aur ab sochtaa huun us kaa bharosa kyaa thaa

hamein ye fikr hai laahaq ki aise aalam mein
navaab-zaada na huqqe ko bartaraf kar dein