sab mumkin thaa pyaar mohabbat hanste chehre khvaab-nagar — Marghoob Ali

main us ko bhuul jaaun raat ye maangi duaa main ne
karun kyaa main agar meri duaa vaapas palaT aae

hamein to yaad bahut aayaa mausam-e-gul mein
vo surkh phuul saa chehra khilaa huaa ab ke

raat paDte hi har ik roz ubhar aati hai
kis ke rone ki sadaa zaat ke sannaaTe mein

bichhaD ke tujh se ajab haal ho gayaa meraa
tamaam shahr paraayaa dikhaai detaa hai

bhigi miTTi ki mahak pyaas baDhaa deti hai
dard barsaat ki bundon mein basaa kartaa hai

mujh ko barbaad khud hi honaa thaa
tum pe ilzaam be-sabab aae

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

haan kuchh bhi to derina mohabbat kaa bharam rakh
dil se na aa duniyaa ko dikhaane ke liye aa

yuun mohabbat se jo chaahe koi apnaa kar le
jo hamaaraa na ho us ke kahin ham hote hain

ik zamaana ho rahaa hai ishq mein ham se khilaaf
kis ke kis ke dil mein dil Daalein ilaahi kyaa karein

kucha-e-yaar mein rahne se nahin aur husul
ishq hai mujh ko ik us ke dar-o-divaar ke saath