pesh-e-zamin rahun ki pas-e-aasmaan rahun — Meer Ahmad Naved

kuchh is tarah se kahaa mujh se baiThne ke liye
ki jaise bazm se us ne uThaa diyaa hai mujhe

main apne hijr mein thaa mubtalaa azal se magar
tire visaal ne mujh se milaa diyaa hai mujhe

zakhm-e-talaash mein hai nihaan marham-e-dalil
tu apnaa dil na haar mohabbat bahaal rakh

jo mil gae to tavangar na mil sake to gadaa
ham apni zaat ke andar chhupaa diye gae hain

mumkin nahin hai shaayad donon kaa saath rahnaa
teri khabar jab aai apni khabar gai hai

charaagh-haa-e-takalluf bujhaa diye gae hain
uThaao jaam ki parde uThaa diye gae hain

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

maarka garm to ho lene do khun-rezi kaa
pahle shamshir ke niche hamin jaa baiTheinge