kar ke bismil na tu ne phir dekhaa — Meer Hasan

dosti kis se na thi kis se mujhe pyaar na thaa
jab bure vaqt pe dekhaa to koi yaar na thaa

jo koi aave hai nazdik hi baiThe hai tire
ham kahaan tak tire pahlu se sarakte jaavein

aasaan na samajhiyo tum nakhvat se paak honaa
ik umr kho ke ham ne sikhaa hai khaak honaa

aashnaa bevafaa nahin hotaa
bevafaa aashnaa nahin hotaa

itne aansu to na the dida-e-tar ke aage
ab to paani hi bharaa rahtaa hai ghar ke aage

sadaa aish dauraan dikhaataa nahin
gayaa vaqt phir haath aataa nahin

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

main phir rahaa huun shahr mein saDkon pe ghaaliban
aavaaz de ke mujh ko miraa ghar pukaar le

us but ke nahaane se huaa saaf ye paani
moti bhi sadaf mein tah-e-dariyaa nazar aayaa

vo mere raaz mujh mein chaahtaa hai munkashif karnaa
mujhe mere ghane saae mein tanhaa chhoD jaataa hai