itnaa mardud huun ki Dar hai mujhe — Meer Mehdi Majrooh

kisi se ishq apnaa kyaa chhupaaein
mohabbat Tapki paDti hai nazar se

kyuun paas mire aa kar yuun baiThe ho munh phere
kyaa lab tire misri hain main jin ko chabaa jaataa

apni kashti kaa hai khudaa haafiz
pichhe tufaan hai saamne girdaab

shaghl-e-ulfat ko jo ahbaab buraa kahte hain
kuchh samajh mein nahin aataa ki ye kyaa kahte hain

tumhein gar khush-zabaan honaa hai saahab
to lo munh mein zaraa meri zabaan ko

ye kyaa ki hamin marte rahein lutf to jab hai
taasir-e-mohabbat jo idhar ho to udhar bhi

leaderi chaaho to lafz-e-qaum hai mehmaan-navaaz
gap-navison ko aur ahl-e-mez ko raazi karo

donon ke dil mein khauf thaa maidaan-e-jang mein
donon kaa khauf faasla thaa darmiyaan kaa

mujhe Dar hai ki ham donon kahin samdhi na ban jaaein
tiri gulnaar college mein miraa gulzaar college mein

jaise dozakh ki havaa khaa ke abhi aayaa ho
kis qadar vaaiz-e-makkaar Daraataa hai mujhe

sang-e-behis se uThi mauj-e-siyah-taab koi
sarsaraataa huaa ik saanp khanDar se niklaa

na jaane baahar bhi kitne aaseb muntazir hon
abhi main andar ke aadmi se Daraa huaa huun