gayaa shabaab na paighaam-e-vasl-e-yaar aayaa — Mirza Raza Barq

ham to apnon se bhi begaana hue ulfat mein
tum jo ghairon se mile tum ko na ghairat aai

na sikandar hai na daaraa hai na qaisar hai na jam
be-mahal khaak mein hain qasr banaane vaale

agar hayaat hai dekheinge ek din didaar
ki maah-e-eid bhi aakhir hai in mahinon mein

daulat nahin kaam aati jo taqdir buri ho
qaarun ko bhi apnaa khazaanaa nahin miltaa

ai sanam vasl ki tadbiron se kyaa hotaa hai
vahi hotaa hai jo manzur-e-khudaa hotaa hai

hamaare aib ne be-aib kar diyaa ham ko
yahi hunar hai ki koi hunar nahin aataa

jab ki pahlu se yaar uThtaa hai
dard be-ikhtiyaar uThtaa hai

raushan jamaal-e-yaar se hai anjuman tamaam
dahkaa huaa hai aatish-e-gul se chaman tamaam

jo chaahtaa hai ki ban jaae vo baDaa shaaer
vo jaa ke dosti gaanThe kisi mudir ke saath

mujh ko ye soch hai jiite hain ve kyun-kar yaa-rab
apne maashuqon se jo shakhs judaa rahte hain

zamaana dosti par in hasinon ki na itraae
ye aalam-dost aksar dushman-e-aalam bhi hote hain

ghash khaa ke 'daagh' yaar ke qadmon pe gir paDaa
behosh ne bhi kaam kiyaa hoshiyaar kaa