aasmaan par jaa pahunchun — Mohammad Alvi

sadiyon se kinaare pe khaDaa suukh rahaa hai
is shahr ko dariyaa mein giraa denaa chaahiye

sardi mein din sard milaa
har mausam bedard milaa

andheraa hai kaise tiraa khat paDhun
lifaafe mein kuchh raushni bhej de

maanaa ki tu zahin bhi hai khub-ru bhi hai
tujh saa na main huaa to bhalaa kyaa buraa huaa

nazron se naaptaa hai samundar ki vusatein
saahil pe ik shakhs akelaa khaDaa huaa

aaj phir mujh se kahaa dariyaa ne
kyaa iraada hai bahaa le jaaun

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa