aap hamdardi na yuun jatlaaiye — Mohammad Mustahsan Jami

mujhe khabar hai kyaa kuchh hai buniyaadon mein
teri basti kaa pahlaa mazdur thaa main

meri khvaahish hai ki ji bhar ke use dekh to luun
hijr ke mumkina sadmaat se pahle pahle

main use yaksui se paDh hi nahin paayaa kabhi
zindagi ke lafz mein kitne jahaan aabaad the

ghurbat kaa ehsaan thaa ham par
ik thaali mein khaa sakte the

lafz aur aavaaz donon kho gae
mujh se haq chhinaa gayaa hai baat kaa

ik karb kaa mausam hai jo daaim hai abhi tak
ik hijr kaa qissa ki mukammal nahin hotaa

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

baarish ke baa'd raat saDak aaina si thi
ik paanv paaniyon pe paDaa chaand hil gayaa

koi shikva na gham na koi yaad
baiThe baiThe bas aankh bhar aai

mire aibon ko ginvaayaa to sab ne
kisi ne meri gham-khvaari nahin ki