tamaam jism ko aankhein banaa ke raah tako — Munawwar Rana

miTTi kaa badan kar diyaa miTTi ke havaale
miTTi ko kahin taaj-mahal mein nahin rakkhaa

ab aap ki marzi hai sambhaalein na sambhaalein
khushbu ki tarah aap ke rumaal mein ham hain

kisi ke zakhm par chaahat se paTTi kaun baandhegaa
agar bahnein nahin hongi to raakhi kaun baandhegaa

kuchh nahin hogaa to aanchal mein chhupaa legi mujhe
maan kabhi sar pe khuli chhat nahin rahne degi

kuchh bikhri hui yaadon ke qisse bhi bahut the
kuchh us ne bhi baalon ko khulaa chhoD diyaa thaa

ye soch ke maan baap ki khidmat mein lagaa huun
is peD kaa saayaa mire bachchon ko milegaa

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

liye phiraa jo mujhe dar-ba-dar zamaane mein
khayaal tujh ko dil-e-be-qaraar kis kaa thaa

hazaaron kaam mohabbat mein hain maze ke 'daagh'
jo log kuchh nahin karte kamaal karte hain

jahaan ho pyaar ghalat-fahmiyaan bhi hoti hain
so baat baat pe yuun dil buraa nahin karte