aur sargarm kiyaa teri kashish ne mujh ko — Mushafi Ghulam Hamdani

ham bhi ai jaan-e-man itne to nahin naakaara
kabhi kuchh kaam tu ham ko bhi to farmaayaa kar

jitnaa ki ye duniyaa mein hamein khvaar rakhe hai
itne to gunahgaar zamaane ke nahin ham

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa

lailaa chali thi haj ke liye jazb-e-ishq se
naaqa machal ke najd ki manzil mein rah gayaa

apni to is chaman mein nit umr yunhi guzri
yaan aashiyaan banaayaa vaan aashiyaan banaayaa

pichhaa kisi tarah ye miraa chhoDtaa nahin
haathon se ishq ke koi jaave kahaan nikal

jab ki pahlu se yaar uThtaa hai
dard be-ikhtiyaar uThtaa hai

kamar-e-yaar hai baariki se ghaaeb har chand
magar itnaa to kahungaa ki vo maadum nahin

hai kabhu dil mein kabhu ji mein kabhu aankhon ke biich
kaun kahtaa hai use yaaro ki harjaai nahin

har dil mein chhupaa hai tiir koi har paanv mein hai zanjir koi
puchhe koi in se gham ke maze jo pyaar ki baatein karte hain

apnon ne nazar pheri to dil tu ne diyaa saath
duniyaa mein koi dost mire kaam to aayaa

allaah re be-khudi ki ham un ke hi ru-ba-ru
be-ikhtiyaar unhi ko pukaare chale gae