ab tum se kyaa kisi se shikaayat nahin mujhe — Nizam Rampuri

ab kyaa milein kisi se kahaan jaaein ham'nizaam'
ham vo nahin rahe vo mohabbat nahin rahi

jo kuchh ishaare hote hain sab dekhtaa huun main
saari sharaarat aap ki meri nazar mein hai

sach hai 'nizaam' yaad bhi us ko na honge ham
par kyaa karein vo ham se bhulaayaa na jaaegaa

teraa milnaa to hai mushkil magar itnaa to huaa
apnaa marnaa mujhe aasaan na huaa thaa so huaa

main na kahtaa thaa ki bahkaaenge tum ko dushman
tum ne kis vaaste aanaa mire ghar chhoD diyaa

uThtaa huun us ki bazm se jab ho ke naa-umid
phir phir ke dekhtaa huun koi ab pukaar le

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

hamaare dil ki tarah shahr ke ye raste bhi
hazaar bhed chhupaae hue se lagte hain

kyaa kahein aur dil ke baare mein
ham mulaazim hain is idaare mein

teraa khayaal teri tamannaa tak aa gayaa
main dil ko DhunDhtaa huaa duniyaa tak aa gayaa

zaraa saa vaqt jo badlaa to ham pe hansne lage
hamaare kaandhe pe sar rakh ke rone vaale log