satyanaas ho gayaa dil kaa — Nooh Narvi

aap jo kahte hain sab hazrat-e-naaseh hai bajaa
kyaa karun zehn se ye lafz utar jaate hain

kambakht kabhi ji se guzarne nahin deti
jiine ki tamannaa mujhe marne nahin deti

aaj aaeinge kal aaeinge kal aaeinge aaj aaeinge
muddat se yahi vo kahte hain muddat se yahi ham sunte hain

aate aate raah par vo aaeinge
jaate jaate bad-gumaani jaaegi

dil ko tum shauq se le jaao magar yaad rahe
ye na meraa na tumhaaraa na kisi kaa hogaa

kuchh aur ban paDi na savaal-e-visaal par
hairat se dekh kar vo mire munh ko rah gae

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

'ishq mein intihaa ki had na hui
'aashiqi teri mustanad na hui

mohabbat phuul banne par lagi thi
palaT kar phir kali kar li hai main ne

kuchh aur vus'atein darkaar hain mohabbat ko
visaal-o-hijr pe daar-o-madaar mushkil hai

tazkira soz-e-mohabbat kaa kiyaa thaa ik baar
taa-dam-e-marg zabaan se miri chhaale na gae