bas ek dhyaan ki main ungli thaam rakhi hai — Parvez Sahir

vaqt achchhaa zarur aataa hai
par kabhi vaqt par nahin aataa

itnaa be-aasraa nahin huun main
aadmi huun khudaa nahin huun main

meri fitrat hi mein shaamil hai mohabbat karnaa
aur fitrat kabhi tabdil nahin ho sakti

puchhaa thaa main ne jab use kyaa mujh se ishq hai?
us ko mire savaal pe hairat nahin hui

'saahir' ye meraa dida-e-giryaan hai aur main
sahraa mein koi dusraa jharnaa to hai nahin

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

gul kiyaa jis ne vo thaa aur magar
shama ne shikva havaaon se kiyaa

kahaan milegi misaal meri sitamgari ki
ki main gulaabon ke zakhm kaanTon se si rahaa huun

kaanTe se bhi nichoD li ghairon ne bu-e-gul
yaaron ne bu-e-gul se bhi kaanTaa banaa diyaa

zabaan-bandi ke mausam mein gali-kuchon ki mat puchho
parindon ke chahakne se shajar aabaad hote hain