aaj junun ke Dhang nae hain — Qabil Ajmeri

rang-e-mahfil chaahtaa hai ik mukammal inqalaab
chand shamon ke bhaDakne se sahar hoti nahin

raasta hai ki kaTtaa jaataa hai
faasla hai ki kam nahin hotaa

ab ye aalam hai ki gham ki bhi khabar hoti nahin
ashk bah jaate hain lekin aankh tar hoti nahin

ham badalte hain rukh havaaon kaa
aae duniyaa hamaare saath chale

tum na maano magar haqiqat hai
ishq insaan ki zarurat hai

vaqt kartaa hai parvarish barson
haadisa ek dam nahin hotaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kahaan milegi misaal meri sitamgari ki
ki main gulaabon ke zakhm kaanTon se si rahaa huun

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

tum gale mil kar jo kahte ho ki ab had se na baDh
haath to gardan mein hain ham paanv phailaaeinge kyaa

aaghosh mein mahkoge dikhaai nahin doge
tum nikhat-e-gulzaar ho ham parda-e-shab hain

shaam ko subh-e-chaman yaad aai
kis ki khushbu-e-badan yaad aai