manzilon ke nishaan nahin milte — Qamar Moradabadi

muddaton baad jo is raah se guzraa huun 'qamar'
ahd-e-rafta ko bahut yaad kiyaa hai main ne

harf aane na diyaa ishq ki khuddaari par
kaam naakaam tamannaa se liyaa hai main ne

kisi ki raah mein kaanTe kisi ki raah mein phuul
hamaari raah mein tufaan hai dekhiye kyaa ho

gham ki tauhin na kar gham ki shikaayat kar ke
dil rahe yaa na rahe azmat-e-gham rahne de

yuun na milne ke sau bahaane hain
milne vaale kahaan nahin milte

jis qadar jazb-e-mohabbat kaa asar hotaa gayaa
ishq khud tark o talab se be-khabar hotaa gayaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

safar mein aise kai marhale bhi aate hain
har ek moD pe kuchh log chhuT jaate hain

dimaagh un ke tajassus mein jism ghar mein rahaa
main apne ghar hi mein rahte hue safar mein rahaa

yaad aai hai to phir TuuT ke yaad aai hai
koi guzri hui manzil koi bhuli hui dost

kin manzilon luTe hain mohabbat ke qaafile
insaan zamin pe aaj gharib-ul-vatan saa hai