uThaa laayaa huun saare khvaab apne — Rasa Chughtai

jin aankhon se mujhe tum dekhte ho
main un aankhon se duniyaa dekhtaa huun

miTTi jab tak nam rahti hai
khushbu taaza-dam rahti hai

aur kuchh yuun huaa ki bachchon ne
chhinaa-jhapTi mein toD Daalaa mujhe

huiin aankhein ajab behaal ab ke
ye baarish kar gai kangaal ab ke

dil dhaDaktaa hai sar-e-raah-e-khayaal
ab ye aavaaz jahaan tak pahunche

hai koi yahaan shahr mein aisaa ki jise main
apnaa na kahun aur vo apnaa mujhe samjhe

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

go faraamoshi ki takmil huaa chaahti hai
phir bhi kah do ki hamein yaad vo aayaa na kare

markaz-e-jaan to vahi tu hai magar tere sivaa
log hain aur bhi is yaad puraani mein kahin

vaqt-e-rukhsat bhigti palkon kaa manzar yaad hai
phuul si aaankhon mein shabnam ki nami achchhi lagi

pahle us ko yaad kiyaa hai
phir aansu ijaad kiyaa hai