mere sukhan ki daad bhi us ko hi dijiye — Sahba Akhtar

hamein khabar hai zan-e-faahisha hai ye duniyaa
so ham bhi saath ise be-nikaah rakhte hain

dil ke ujDe nagar ko kar aabaad
is Dagar ko bhi koi raahi de

subut maang rahe hain miri tabaahi kaa
mujhe tabaah kiyaa jin ki kaj-adaai ne

bayaan-e-laghzish-e-aadam na kar ki vo fitna
miri zamin se nahin tere aasmaan se uThaa

shaayad vo sang-dil ho kabhi maail-e-karam
surat na de yaqin ki is ehtimaal ko

'sahbaa' saahab dariyaa ho to dariyaa jaisi baat karo
tez havaa se lahar to ik jauhaD mein bhi aa jaati hai

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

ye mere saathi hain pyaare saathi magar inhein bhi nahin gavaaraa
main apni vahshat ke maqbare se nai tamannaa ke khvaab dekhun

abhi hain qurb ke kuchh aur marhale baaqi
ki tujh ko paa ke hamein phir tiri tamannaa hai

us ko fursat bhi nahin mujh ko tamannaa bhi nahin
phir khalish kyaa hai ki rah rah ke vafaa DhunDhti hai

phunkaa hai kis ne gosh-e-mohabbat mein ai khudaa
afsun-e-intizaar tamannaa kahein jise

meri khvaahish hai ki ji bhar ke use dekh to luun
hijr ke mumkina sadmaat se pahle pahle