thaa anal-haq lab-e-mansur pe kyaa aap se aap — Sahir Dehlavi

qulzum-e-fikr mein hai kashti-e-imaan saalim
naa-khudaa husn hai aur ishq hai langar apnaa

mil-milaa ke donon ne dil ko kar diyaa barbaad
husn ne kiyaa be-khud ishq ne kiyaa aazaad

jo laa-mazhab ho us ko millat-o-mashrab se kyaa matlab
miraa mashrab hai rindi rind ko mazhab se kyaa matlab

aate hue is tan mein na jaate hue tan se
hai jaan-e-makin ko na lagaavaT na rukaavaT

gham-e-maujud ghalat aur gham-e-fardaa baatil
raahat ik khvaab hai jis ki koi taabir nahin

ahd-e-misaaq kaa laazim hai adab ai vaaiz
hai ye paimaan-e-vafaa rishta-e-zunnaar na toD

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

ghurur bhi jo karun main to aajizi ho jaae
khudi mein lutf vo aae ki be-khudi ho jaae

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

jab talak shisha rahaa main baar-haa toDaa gayaa
ban gayaa patthar to sab ne devtaa maanaa mujhe

kuchh phulon ki khaatir bhi kuchh phulon kaa
sab se achchhaa rang churaanaa paDtaa hai