'sarshaar' main ne ishq ke maani badal diye — Sarshar Siddiqui

main ne ibaadaton ko mohabbat banaa diyaa
aankhein buton ke saath rahin dil khudaa ke saath

ik kaar-e-muhaal kar rahaa huun
zinda huun kamaal kar rahaa huun

ujDe hain kai shahar, to ye shahar basaa hai
ye shahar bhi chhoDaa to kidhar jaaoge logo

niind TuuTi hai to ehsaas-e-ziyaan bhi jaagaa
dhuup divaar se aangan mein utar aai hai

naa-mustajaab itni duaaein huiin ki phir
meraa yaqin bhi uTh gayaa rasm-e-duaa ke saath

miri talab mein takalluf bhi inkisaar bhi thaa
vo nukta-sanj thaa sab mere hasb-e-haal diyaa

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

sadiyon mein koi ek mohabbat hoti hai
baaqi to sab khel tamaashaa hotaa hai

puuri ho jaati agar koi kahaani hoti
ye mohabbat hai miyaan is mein kasak rahti hai

hamin se anjuman-e-ishq mo'tabar Thahri
hamin ko saunpi gai gham ki paasbaani bhi