sochtaa huun ki us se bach niklun — Sarvat Husain

saya-e-abr se puchho 'sarvat'
apne hamraah agar le jaae

shahzaadi tujhe kaun bataae tere charaag-kade tak
kitni mehraabein paDti hain kitne dar aate hain

kyuun girafta-dil nazar aati hai ai shaam-e-firaaq
ham jo tere naaz uThaane ke liye maujud hain

jise anjaam tum samajhti ho
ibtidaa hai kisi kahaani ki

ik daastaan ab bhi sunaate hain farsh o baam
vo kaun thi jo raqs ke aalam mein mar gai

teri aashufta-mizaaji ai dil
kyaa khabar kaun nagar le jaae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

jinhein ye fikr nahin sar rahe rahe na rahe
vo sach hi kahte hain jab bolne pe aate hain

be-fikr raho yaaro main aaj bhi huun barbaad
din phir gae hain mere afvaah uDi hogi

jaane kyaa soch ke phir in ko rihaai de di
ham ne ab ke bhi parindon ko tah-e-daam kiyaa

tah kar chuke bisaat-e-gham-o-fikr-e-rozgaar
tab khaanqaah-e-ishq-o-mohabbat mein aae hain

kabhi miloge ye soch kar dil
hazaar sapne bunaa karegaa