bas yahi hogaa ki divaana kaheinge ahl-e-bazm — Shahzad Ahmad

zabaanein thak chukin patthar hue kaan
kahaani an-kahi thi an-kahi hai

shaayad isi baais huiin patthar miri aankhein
jo kuchh ki mujhe dekhnaa thaa dekh liyaa hai

khalq be-parvaa khudaa bandon se tang aayaa huaa
main akelaa phir rahaa huun hashr ke maidaan mein

ek se manzar dekh dekh kar aankhein dukhne lagti hain
is raste par peD bahut hain aur haraa koi bhi nahin

main sun rahaa huun magar dusron ko kaise sunaaun
jo giit gunjtaa rahtaa hai mere kaanon mein

bharpur nahin hain kisi chehre ke khad-o-khaal
dekhaa nahin vo chaand jo puuraa nazar aae

main baDaa ho gayaa huun magar bachpanaa
mere dil se kabhi bhi gayaa hi nahin

raat yuun dil mein tiri khoi hui yaad aai
jaise viraane mein chupke se bahaar aa jaae

parde mein khamoshi ke burqe mein udaasi ke
shaayad koi aa jaae darvaaza khulaa rakhnaa

koThe ujaaD khiDkiyaan chup raaste udaas
jaate hi un ke kuchh na rahaa zindagi ke paas

andheraa itnaa nahin hai ki kuchh dikhaai na de
sukut aisaa nahin hai jo kuchh sunaai na de

vo arz-e-gham pe miri un kaa ehtimaam-e-sukut
tamaam shorish-e-tafsil-e-vaaqiaat gai