kyaa baDhegaa vo tasavvur ki hadon se aage — Shaukat Pardesi

ye kaisi be-qaraari sunne vaalon ke dilon mein hai
varaq dohraa rahaa hai kyaa koi meri kahaani kaa

un ki nigaah-e-naaz ki gardish ke saath saath
mahsus ye huaa ki zamaana badal gayaa

us ki hansi tum kyaa samjho
vo jo pahron royaa hai

ai inqalaab-e-nau tiri raftaar dekh kar
khud ham bhi sochte hain ki ab tak kahaan rahe

sharik-e-dard nahin jab koi to ai 'shaukat'
khud apni zaat ki bechaargi ghanimat hai

hudud-e-jism se aage baDhe to ye dekhaa
ki tishnagi thi barahna tiri adaaon tak

mere khvaabon ke jharokon ko sajaate rahiye
na sahi vasl magar yaad to aate rahiye

basi hai sukhe gulaabon ki baat saanson mein
koi khayaal kisi yaad ke hisaar mein hai

vo tiraa unchi haveli ke qafas mein rahnaa
yaad aae to parindon ko rihaa kartaa huun

bas ek raat se kaise thakan utarti hai
badan ko chaahiye aaraam kuchh ziyaada hi

bevafaai ki jab bhi baat chali
baa-khudaa tum bahut hi yaad aae

main us ke baare mein itnaa ziyaada sochtaa huun
ki ek roz use ru-ba-ru to honaa hai