kabhi ziyaada kabhi kam rahaa hai aankhon mein — Shaz Tamkanat

koi to aa ke rulaa de ki hans rahaa huun main
bahut dinon se khushi ko taras rahaa huun main

miraa zamir bahut hai mujhe sazaa ke liye
tu dost hai to nasihat na kar khudaa ke liye

un se milte the to sab kahte the kyuun milte ho
ab yahi log na milne kaa sabab puchhte hain

kitaab-e-husn hai tu mil khuli kitaab ki tarah
yahi kitaab to mar mar ke main ne azbar ki

us kaa honaa bhi bhari bazm mein hai vajh-e-sukun
kuchh na bole bhi to vo meraa taraf-daar lage

aage aage koi mishal si liye chaltaa thaa
haae kyaa naam thaa us shakhs kaa puchhaa bhi nahin

mere khvaabon ke jharokon ko sajaate rahiye
na sahi vasl magar yaad to aate rahiye

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

jiinaa taDap taDap kar marnaa sisak sisak kar
fariyaad ek ji hai kyaa kyaa kharaabiyon mein

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

vo sahraa jis mein kaT jaate hain din yaad-e-bahaaraan se
ba-alfaaz-e-digar us ko chaman kahnaa hi paDtaa hai