vasl mein suukh gai hai miri sochon ki zamin — Siraj Faisal Khan

main kahkashaaon mein khushiyaan talaashne niklaa
mire sitaare meraa chaand sab udaas rahe

zamin mere sajde se tharraa gai
mujhe aasmaan se pukaaraa gayaa

bichhaD jaaeinge ham donon zamin par
ye us ne aasmaan par likh diyaa hai

likkhaa hai taarikh ke safhe safhe par ye
shaahon ko bhi daas banaayaa jaa saktaa hai

us ke dil ki aag ThanDi paD gai
mujh ko shohrat mil gai ilzaam se

aaj meri ik ghazal ne us ke honTon ko chhuaa
aaj pahli baar apni shaairi achchhi lagi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

jinhein ye fikr nahin sar rahe rahe na rahe
vo sach hi kahte hain jab bolne pe aate hain

sochaa thaa lauT aaegaa apnaa samajh ke vo
us ko gila hai mujh ko pukaaraa nahin gayaa

sochte aur jaagte saanson kaa ik dariyaa huun main
apne gum-gashta kinaaron ke liye bahtaa huun main

ye soch kar vujud faraamosh kar diyaa
khud se milaa to teri tamanna karungaa main

vahaan bhi 'aql hi masnad-nashin mili ki jahaan
mataa'-e-fikr-o-nazar kaa koi savaal na thaa