kahte the tujhi ko jaan apni — Syed Aabid Ali Aabid

ai iltifaat-e-yaar mujhe sochne to de
marne kaa hai maqaam yaa jiine kaa mahal

dam-e-rukhsat vo chup rahe 'aabid'
aankh mein phailtaa gayaa kaajal

jalva-e-yaar se kyaa shikva-e-bejaa kiije
shauq-e-didaar kaa aalam vo kahaan hai ki jo thaa

tere khush-posh faqiron se vo milte to sahi
jo ye kahte hain vafaa pairhan-e-chaak mein hai

yaa kabhi aashiqi kaa khel na khel
yaa agar maat ho to haath na mal

meraa jiinaa hai sej kaanTon ki
un ke marne kaa naam taaj-mahal

kyon tasavvur mein ji rahaa huun main
jab haqiqat mein mar hi jaanaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

chhup gayaa eid kaa chaand nikal kar der hui par jaane kyon
nazrein ab tak Tiki hui hain masjid ke minaaron par

duniyaa gharib jaan ke hansti thi 'mir' par
'iqbaal' mujh pe aise ye duniyaa hansi ki bas