paise kaa mol-tol hai ab ishq kaa nahin — T N Raaz

raas aataa hi nahin ham ko sakun
shaanti ko bhang karnaa chaahiye

meri masarraton kaa sabab bas yahi to hai
main rishvaton ke biich mein haail nahin rahaa

jab se baDhaa hai shahr mein mauton kaa silsila
hamraah apne rakhtaa huun ik nauhagar ko main

jo zakhm judaai ke diye un pe miri jaan
sastaa saa hi marham tu lagaane ke liye aa

dil lagi ki baat Dhalti umr mein
'raaz' ki surat to dekhaa chaahiye

jab se akaD ke 'raaz' main paDhne lagaa huun sher
main bhi paDhe likhon mein huun jaahil nahin rahaa

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

sabhi se jab mohabbat chaahte ho
mohabbat kyon nahin karte sabhi se

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

nahin vo sham-e-mohabbat rahi to phir 'aasim'
ye kis duaa se mire ghar mein raushni si hai

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa