bardaasht dard-e-ishq ki dushvaar ho gai — Tajwar Najibabadi

nazar bhar ke jo dekh sakte hain tujh ko
main un ki nazar dekhnaa chaahtaa huun

aah us ki be-kasi tu na jis ke saath ho
haae us ki bandagi jis kaa tu khudaa nahin

uf vo nazar ki sab ke liye dil-navaaz hai
meri taraf uThi to talvaar ho gai

khudaa mujh ko tujh se hi mahrum kar de
jo kuchh aur tere sivaa chaahtaa huun

kahin rusvaa na hon ranginiyaan dard-e-mohabbat ki
miraa itnaa khayaal ai dida-e-khun-baar kar lenaa

dil ke pardon mein chhupaayaa hai tire ishq kaa raaz
khalvat-e-dil mein bhi pardaa nazar aataa hai mujhe

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

sadqe tire hote hain suraj bhi sitaare bhi
ham kis se kahein dil hai siine mein hamaare bhi

bad-gumaani ko baDhaa kar tum ne ye kyaa kar diyaa
khud bhi tanhaa ho gae mujh ko bhi tanhaa kar diyaa

dil ki udaasiyon kaa koi sabab nahin hai
bas ye sabab hai mere dil ki udaasiyon kaa