ham us ko saari umr uThaae phiraa kiye — Tariq Qamar

jaise mumkin ho in ashkon ko bachaao 'taariq'
shaam aai to charaaghon ki zarurat hogi

is lahje se baat nahin ban paaegi
talvaaron se kaise kaanTe nikleinge

phir aaj bhuuk hamaaraa shikaar kar legi
ki raat ho gai dariyaa mein jaal Daale hue

koi shikva na shikaayat na vazaahat koi
mez se bas miri tasvir haTaa di us ne

mizaaj apnaa milaa hi nahin zamaane se
na main huaa kabhi is kaa na ye zamaana miraa

saath hone ke yaqin mein bhi mire saath ho tum
aur na hone ke bhi imkaan mein rakkhaa hai tumhein

kam-umri mein sunet hain
mar jaate hain achchhe log

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

zindagi zor hai ravaani kaa
kyaa thamegaa bahaav paani kaa

afsos umr kaT gai ranj-o-malaal mein
dekhaa na khvaab mein bhi jo kuchh thaa khayaal mein

umr-bhar jis ke liye aankhein rahi hain farsh-e-raah
vo ajal kaa qaasid-e-farkhanda-gaam aa hi gayaa