anjaam us ke haath hai aaghaaz kar ke dekh — Unknown

log kaanTon se bach ke chalte hain
main ne phulon se zakhm khaae hain

dil TuTne se thoDi si taklif to hui
lekin tamaam umr ko aaraam ho gayaa

duniyaa mein vahi shakhs hai taazim ke qaabil
jis shakhs ne haalaat kaa rukh moD diyaa ho

miri namaaz-e-janaaza paDhi hai ghairon ne
mare the jin ke liye vo rahe vazu karte

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain

jin ke kirdaar se aati ho sadaaqat ki mahak
un ki tadris se patthar bhi pighal sakte hain

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

mohtasib aao chalein aaj to mai-khaane mein
ek jannat hai vahaan aap ki jannat ke sivaa

miri taqdir se pahle sanvarnaa jin kaa mushkil hai
tiri zulfon mein kuchh aise bhi kham mahsus kartaa huun

kitne lage hain zakhm jigar par kise khabar
Dhaai hai kis ne kitni qayaamat na puchhiye

ek malaal ki gard sameTe main ne khud ko paar kiyaa
kaise kaise vasl guzaare hijr kaa zakhm chhupaane mein