kuchh itne diye hasrat-e-didaar ne dhoke — Unknown

log kaanTon se bach ke chalte hain
main ne phulon se zakhm khaae hain

dil TuTne se thoDi si taklif to hui
lekin tamaam umr ko aaraam ho gayaa

duniyaa mein vahi shakhs hai taazim ke qaabil
jis shakhs ne haalaat kaa rukh moD diyaa ho

miri namaaz-e-janaaza paDhi hai ghairon ne
mare the jin ke liye vo rahe vazu karte

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain

jin ke kirdaar se aati ho sadaaqat ki mahak
un ki tadris se patthar bhi pighal sakte hain

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

maut ki aarzu mein divaane
umr-bhar zindagi se laDte hain

jab dil hi nahin hai pahlu mein phir ishq kaa saudaa kaun kare
ab un se mohabbat kaun kare ab un ki tamannaa kaun kare

pyaasi bahut thiin hasratein lo aaj mar gaiin
baarish kaa intizaar thaa vo bhi nahin rahaa

hamin pe khatm hain jaur-o-sitam zamaane ke
hamaare baad use kis ki aarzu hogi

baDe dilchasp vaade the baDe rangin dhoke the
gulon ki aarzu mein zindagi shole uThaa laai