rahtaa hai mai-khaane hi ke aas-paas — Unknown

log kaanTon se bach ke chalte hain
main ne phulon se zakhm khaae hain

dil TuTne se thoDi si taklif to hui
lekin tamaam umr ko aaraam ho gayaa

duniyaa mein vahi shakhs hai taazim ke qaabil
jis shakhs ne haalaat kaa rukh moD diyaa ho

miri namaaz-e-janaaza paDhi hai ghairon ne
mare the jin ke liye vo rahe vazu karte

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain

jin ke kirdaar se aati ho sadaaqat ki mahak
un ki tadris se patthar bhi pighal sakte hain

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

aazaadiyon kaa haq na adaa ham se ho sakaa
anjaam ye huaa ki giraftaar ho gae

mai-kasho mai ki kami beshi pe naahaq josh hai
ye to saaqi jaantaa hai kis ko kitnaa hosh hai

us ke baa'd agli qayaamat kyaa hai kis ko hosh hai
zakhm sahlaataa thaa aur ab daagh dikhlaataa huun main

hamein anjaam bhi maalum hai lekin na jaane kyuun
charaaghon ko havaaon se bachaanaa chaahte hain ham