main boltaa gayaa huun vo suntaa rahaa khaamosh — Waseem Barelvi

ham ye to nahin kahte ki ham tujh se baDe hain
lekin ye bahut hai ki tire saath khaDe hain

tahrir se varna miri kyaa ho nahin saktaa
ik tu hai jo lafzon mein adaa ho nahin saktaa

raat to vaqt ki paaband hai Dhal jaaegi
dekhnaa ye hai charaaghon kaa safar kitnaa hai

bhare makaan kaa bhi apnaa nasha hai kyaa jaane
sharaab-khaane mein raatein guzaarne vaalaa

shartein lagaai jaati nahin dosti ke saath
kiije mujhe qubul miri har kami ke saath

hamaare ghar kaa pataa puchhne se kyaa haasil
udaasiyon ki koi shahriyat nahin hoti

main baDaa ho gayaa huun magar bachpanaa
mere dil se kabhi bhi gayaa hi nahin

ye dil kaa karb labon tak kabhi na aaegaa
mire liye ye khamoshi kaa irtiqaa hi sahi

rah-e-hayaat mein shaayad hi vo maqaam aae
ki naghma-haa-e-junun par sukut taari ho

khuli zabaan to zarf un kaa ho gayaa zaahir
hazaar bhed chhupaa rakkhe the khamoshi mein

mohabbat soz bhi hai saaz bhi hai
khamoshi bhi hai ye aavaaz bhi hai

lab-e-khaamosh mein hi jaa-e-amaan aaj bhi hai
varna kahne ko to har munh mein zabaan aaj bhi hai