vo jise saare zamaane ne kahaa meraa raqib — Zuhoor Nazar

baad-e-tark-e-ulfat bhi yuun to ham jiye lekin
vaqt be-tarah biitaa umr be-sabab guzri

barson se khaDaa huun haath uThaae
taasir-e-duaa kaa muntazir huun

ghar se us kaa bhi nikalnaa ho gayaa aakhir muhaal
meri rusvaai se shohrat ku-ba-ku us ki bhi thi

na so sakaa huun na shab jaag kar gizaari hai
ajiib din hain sukun hai na be-qaraari hai

sunte hain chamaktaa hai vo chaand ab bhi sar-e-baam
hasrat hai ki bas ek nazar dekh lein ham bhi

vo bhi shaayad ro paDe viraan kaaghaz dekh kar
main ne us ko aakhiri khat mein likhaa kuchh bhi nahin

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

us ne ikhlaas ke maare hue divaane ko
ek aavaara o badnaam saa shaaer jaanaa

taaaqub mein hai mere yaad kis ki
main kis ko bhuul jaanaa chaahtaa huun

chalo maanaa ki khvaabon mein miloge
magar tum bin kise niind aa rahi hai

ik chingaari aag lagaa jaati hai ban mein aur kabhi
ek kiran se zulmat ko chhaT jaanaa paDtaa hai