Ahmad Alvi

nuqsaan ho rahaa hai bahut kaarobaar mein
abbaa paDe hain jab se paDosan ke pyaar mein

sunaa ye hai banaa karte hain joDe aasmaanon par
to ye samjhein ki har biivi balaa-e-aasmaani hai

alfaaz ki adaaegi tarz-e-bayaan siikh
karnaa agar hai ishq to urdu zabaan siikh

mohabbaton mein to kuchh bhi pataa nahin lagtaa
bahut buraa hai vo phir bhi buraa nahin lagtaa

sau koshishon se aae the chandiyaa pe chaar baal
do aarzu mein kaT gae do intizaar mein

gae zamaane ki baatein hain shakl aur surat
bas ab to ahl-e-nazar kham kamar ke dekhte hain

ta'alluqaat bhi resham ki tarah hote hain
ulajh gae to siraa umr bhar nahin miltaa

dil ko kisi ki yaad se khaali na kijiye
aaseb rahne lagte hain khaali makaan mein

kareinge aankh-maTakkaa vo kyaa paDosan se
jo log apni hi biivi ko Dar ke dekhte hain

do sagi bahnon ki do ganjon se shaadi ho gai
aur ye be-zulf bhi ham-zulf kahlaane lage

is se pahle udhaar tu maange
main tiraa shahr chhoD jaaungaa

main hi tum ko phuTi aankh nahin bhaati
tum ne sab se pyaar ke pech laDaae hain