Razi Abuzar

kisi se mil ke kisi ko buraa saa lagtaa hai
baDaa gunaah hai garche zaraa saa lagtaa hai

raabte TuuTe hain rishte rah gae hain naam ke
talkhiyaan haael dilon ke darmiyaan hoti gaiin

shafaq kaa rang sukun hai sahar ke chehre par
ki gesu-e-shab-e-gham be-qaraar hai ab tak

jalaa hai parda-e-shab mein hujum-e-parvaana
barahna sham' magar be-qaraar hai ab tak

sar-e-khaamushi ye sajaavaTein usi rang-o-bu ki misaal hain
jo mahak ho qabr ke phuul mein jo chamak ho sham'-e-mazaar mein

chappa chappa konaa konaa shahr kaa ham ne chhaanaa hai
vaqt ne karvaT badli ab har moD yahaan an-jaanaa hai

jab zabaan rakkhi hai main ne halqa-e-zanjir mein
tab kahin aai hai shiddat she'r ki taasir mein

hijaabaana aa kar vo chalte bane
mujhe 'ishq kaa vasvasa rah gayaa

tiraa ye zaabta-e-ehtijaaj achchhaa hai
ki ranj ho ke bhi kahnaa mizaaj achchhaa hai