jalaa hai parda-e-shab mein hujum-e-parvaana — Razi Abuzar

kisi se mil ke kisi ko buraa saa lagtaa hai
baDaa gunaah hai garche zaraa saa lagtaa hai

raabte TuuTe hain rishte rah gae hain naam ke
talkhiyaan haael dilon ke darmiyaan hoti gaiin

shafaq kaa rang sukun hai sahar ke chehre par
ki gesu-e-shab-e-gham be-qaraar hai ab tak

jab zabaan rakkhi hai main ne halqa-e-zanjir mein
tab kahin aai hai shiddat she'r ki taasir mein

hijaabaana aa kar vo chalte bane
mujhe 'ishq kaa vasvasa rah gayaa

sar-e-khaamushi ye sajaavaTein usi rang-o-bu ki misaal hain
jo mahak ho qabr ke phuul mein jo chamak ho sham'-e-mazaar mein

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

rok do ye raushni ki tez dhaar
meri miTTi mein gundhi hai raat bhi

rang ho raushni ho yaa khushbu
sab mein partav usi hasin ke hain

baarish ke baa'd raat saDak aaina si thi
ik paanv paaniyon pe paDaa chaand hil gayaa