aabaadiyon mein dasht kaa manzar bhi aaegaa — Naushad Ali

"ye baatein aaj ki kal jis kitaab mein likhnaa tum apne jurm ko mere hisaab mein likhnaa hadis-e-dil ko qalam se na aashnaa karnaa kahaaniyaan hi hamesha javaab mein likhnaa mujhe samajhne ki koshish hai shaghl-e-laa-haasil jo chaahnaa vahi tum mere baab mein likhnaa vo kahte hain likho naama magar lihaaz rahe hamaaraa naam na hargiz khitaab mein likhnaa miTaa miTaa jo rahaa zulmaton ke parde mein vo harf-e-haq varaq-e-aaftaab mein likhnaa hamesha jis ki havas ko thi aarzu-e-bahisht usi ki ruuh rahi thi azaab mein likhnaa jo baat likhne ko thaa muztarib bahut 'naushaad' vahi main bhuul gayaa iztiraab mein likhnaa"

"ham doston ke lutf-o-karam dekhte rahe hote rahe jo dil pe sitam dekhte rahe khaamosh qahqahon mein bhi gham dekhte rahe duniyaa na dekh paai jo ham dekhte rahe allaah-re josh-e-ishq ki uThti jidhar nazar tum ko hi bas khudaa ki qasam dekhte rahe naagaah paD gai jo kahin un pe ik nazar taa-der apne aap ko ham dekhte rahe ham ne to baDh ke chuum liyaa aastaan-e-yaar hasrat se ham ko dair o haram dekhte rahe jo saath mere chal na sake raah-e-shauq mein vo sirf mere naqsh-e-qadam dekhte rahe barson ke baad un se mile bhi to is tarah pahron vo ham ko aur unhein ham dekhte rahe har shaam ek khvaab-e-sahar mein guzaar di har subh ek shaam-e-alam dekhte rahe chalte hi daur-e-jaam jo ahl-e-nigaah the kis kis ki aastin thi nam dekhte rahe sab kuchh vahi thaa phir bhi gulistaan mein aaj ham kyaa shai thi ho gai hai jo kam dekhte rahe basti mein log aise bhi hain kuchh base hue aayaa jidhar se tir-e-sitam dekhte rahe aae the apne chaahne vaalon ko dekhne kitnaa hai kis mariz mein dam dekhte rahe"

"zanjir-e-junun kuchh aur khanak ham raqs-e-tamannaa dekheinge duniyaa kaa tamaasha dekh chuke ab apnaa tamaasha dekheinge ik umr hui ye soch ke ham jaate hi nahin gulshan ki taraf tum aur bhi yaad aaoge hamein jab gul koi khiltaa dekheinge kyaa faaeda aise manzar se kyuun khud hi na kar lein band aankhein itni hi baDhegi tishna-labi ham aap ko jitnaa dekheinge tum kyaa samjho tum kyaa jaano furqat mein tumhaari divaane kyaa jaaniye kyaa kyaa dekh chuke kyaa jaaniye kyaa kyaa dekheinge hone do andheraa aaj ki shab gul kar do charaaghon ke chehre ham aaj khud apni mahfil mein dil apnaa hi jaltaa dekheinge 'naushaad' ham un ki mahfil se is vaaste uTh kar aae hain parvaanon kaa jalnaa dekh chuke ab apnaa taDapnaa dekheinge"

"pahle to Dar lagaa mujhe khud apni chaap se phir ro diyaa main mil ke gale apne aap se dekhaa hai haan use hai vo kuchh miltaa jultaa saa mutrib ki miThi miThi surili alaap se thi baat hi kuchh aisi ki divaana ho gayaa divaana varna bantaa hai kaun apne aap se rahnaa hai jab harif hi ban kar tamaam umr kyaa faaeda hai yaar phir aise milaap se aayaa idhar khayaal udhar mahv ho gayaa kahne ko thaa na jaane abhi kyaa main apne aap se ham aur lagaaein apne paDosi ke ghar mein aag bhagvaan hi bachaae hamein aise paap se 'naushaad' raat kaisi thi vo mahfil-e-tarab lagti thi dil pe choT si table ki thaap se"

"duniyaa kahin jo banti hai miTti zarur hai parde ke pichhe koi na koi zarur hai jaate hain log jaa ke phir aate nahin kabhi divaar ke udhar koi basti zarur hai mumkin nahin ki dard-e-mohabbat ayaan na ho khilti hai jab kali to mahakti zarur hai ye jaante hue ki pighalnaa hai raat bhar ye shama kaa jigar hai ki jalti zarur hai naagin hi jaaniye use duniyaa hai jis kaa naam laakh aastin mein paaliye Dasti zarur hai jaan de ke bhi kharido to duniyaa na aae haath ye musht-e-khaak kahne ko sasti zarur hai"

"khair maangi jo aashiyaane ki aandhiyaan hans paDin zamaane ki mere gham ko samajh sakaa na koi mujh ko aadat hai muskuraane ki dil saa ghar Dhaa diyaa to kis munh se baat karte ho ghar basaane ki husn ki baat ishq ke qisse baat karte ho kis zamaane ki dil hi qaabu mein ab nahin meraa ye qayaamat tiri adaa ne ki kuchh to tufaan ki zad mein ham aae kuchh navaazish bhi naa-khudaa ne ki mujh ko tum yaad aur bhi aae koshishein jitni ki bhulaane ki vo hi 'naushaad' fan kaa shaidaai baat karte ho kis divaane ki"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"kal shab dil-e-aavaara ko siine se nikaalaa ye aakhiri kaafir bhi madine se nikaalaa ye fauj nikalti thi kahaan khaana-e-dil se yaadon ko nihaayat hi qarine se nikaalaa main khuun bahaa kar bhi huaa baagh mein rusvaa us gul ne magar kaam pasine se nikaalaa Thahre hain zar-o-sim ke haqdaar tamaashaai aur maar-e-siyah ham ne dafine se nikaalaa ye soch ke saahil pe safar khatm na ho jaae baahar na kabhi paanv safine se nikaalaa"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"