aankhein banaataa dasht ki vusat ko dekhtaa — Ahmad Rizwan

"aataa hi nahin hone kaa yaqin kyaa baat karun hai duur bahut vo khvaab-nashin kyaa baat karun kyaa baat karun jo aks thaa meri aankhon mein vo chhoD gayaa ik shaam kahin kyaa baat karun kyaa baat karun jo ghaDiyaan meri hamdam thiin vo ghaDiyaan hi aazaar banin kyaa baat karun kyaa baat karun mire saathi mujh se chhuT gae vo log nahin vo khvaab nahin kyaa baat karun kyaa baat karun ye log bhalaa kab sunte hain sab baatein andar Duub gaiin kyaa baat karun kyaa baat karun apnon ki jitni laashein thiin mire siine mein sab aan girin kyaa baat karun kyaa baat karun jo baatein tum se karni thiin ab un baaton kaa vaqt nahin kyaa baat karun kyaa baat karun kabhi paani baatein kartaa thaa ye dariyaa is ki khushk zamin kyaa baat karun kyaa baat karun sahraa mein chaand akelaa hai aur mere saath bhi koi nahin kyaa baat karun kyaa baat karun 'rizvaan' ki ronaa aataa hai sab baatein us ki baat se thiin kyaa baat karun"

"khaak dekhi hai shafaq-zaar falak dekhaa hai zarf bhar teri tamannaa mein bhaTak dekhaa hai aisaa lagtaa hai koi dekh rahaa hai mujh ko laakh is vahm ko sochon se jhaTak dekhaa hai qudrat-e-zabt bhi logon ko dikhaai ham ne surat-e-ashk bhi aankhon se chhalak dekhaa hai jaane tum kaun se manzar mein chhupe baiThe ho meri aankhon ne bahut duur talak dekhaa hai raat kaa khauf nahin ghaTtaa andheraa to kujaa sab tarah-daar sitaaron ne chamak dekhaa hai ek muddat se use dekh rahaa huun 'ahmad' aur lagtaa hai abhi ek jhalak dekhaa hai"

"abad kaa raasta maalum ho jaaegaa mujh mein koi din aasmaan maadum ho jaaegaa mujh mein sitaare silsila-dar-silsila raushan raheinge magar ik aaina maghmum ho jaaegaa mujh mein koi puchhegaa mujh se raat ki saari kahaani koi aavaaz se mahrum ho jaaegaa mujh mein tilism-e-khvaab bhi khul jaaegaa us roz 'ahmad' ayaan har baat kaa mafhum ho jaaegaa mujh mein"

"kisi ko chhoD detaa huun kisi ke saath chaltaa huun main chaltaa huun to phir vaabastagi ke saath chaltaa huun sitaare baanTne vaale kisi pal lauT aaeinge chalo kuchh der yunhi tirgi ke saath chaltaa huun mujhe ye kyaa paDi hai kaun meraa ham-safar hogaa havaa ke saath gaataa huun nadi ke saath chaltaa huun vo kahte hain zamaana tez hai lambi masaafat hai mohabbat kaa sitaaraa huun sabhi ke saath chaltaa huun badalte mausamon kaa khvaab huun kitne zamaanon se yahaan main kaarvaan-e-zindagi ke saath chaltaa huun manaazir rok lete hain mire uThte qadam 'ahmad' zaraa saa bhi agar begaanagi ke saath chaltaa huun"

"shab Dhale gumbad-e-asraar mein aa jaataa hai ek saaya dar-o-divaar mein aa jaataa hai main abhi ek havaale se use dekhtaa huun dafatan vo nae kirdaar mein aa jaataa hai yuun shab-e-hijr shab-e-vasl mein Dhal jaati hai koi mujh saa miri guftaar mein aa jaataa hai mujh saa divaana koi hai jo tire naam ke saath raqs kartaa huaa baazaar mein aa jaataa hai jab vo kartaa hai nae Dhab se miri baat ko radd lutf kuchh aur bhi guftaar mein aa jaataa hai dekhnaa us ko bhi paDtaa hai miyaan duniyaa mein saamne jo yunhi be-kaar mein aa jaataa hai ek din qais se jaa miltaa hai vahshat ke tufail jo bhi is dasht-e-sukhan-zaar mein aa jaataa hai main kabhi khud ko agar DhunDhnaa chaahun 'ahmad' dusraa maariz-e-izhaar mein aa jaataa hai"

"masaafaton kaa kabhi ikhtitaam kar mujh mein ai baad-e-asr kabhi to qiyaam kar mujh mein azal ki aankh mein jo tu ne rakh diyaa thaa kabhi us ek khvaab kaa manzar tamaam kar mujh mein hai istaada bachaane ke vaaste koi mire vajud ki divaar thaam kar mujh mein main tere saamne tanhaa khaDaa huun husn-e-azal shuur-e-khalq se haT kar kalaam kar mujh mein"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"