ab agar aur chup rahungaa main — Jahangeer Nayab

"ik justuju sadaa hi se zehn-e-bashar mein hai jab se mili zamin musalsal safar mein hai har-chand mere saath udaasi safar mein hai raushan charaagh-e-shauq magar chashm-e-tar mein hai mallaah kah rahaa hai ki saahil hai bas qarib lekin mujhe pata hai ki kashti bhanvar mein hai tum se kabhi jo bol na paayaa main ek baat ban kar khalish vo aaj bhi mere jigar mein hai barbaadiyon ki zad pe faqat shaakh-e-gul nahin gulshan tamaam nargha-e-barq-o-sharar mein hai jab se main un ke halqa-e-baiat mein aa gayaa 'naayaab' ek raushni fikr-o-nazar mein hai"

"main jab bhi koi manzar dekhtaa huun zaraa auron se haT kar dekhtaa huun kabhi main dekhtaa huun us ki rahmat kabhi main apni chaadar dekhtaa huun nazar kaa zaaviya badlaa hai jab se main kuuze mein samundar dekhtaa huun kabhi mere liye the phuul jin mein ab un haathon mein patthar dekhtaa huun sabhi hain mubtalaa-e-khud-farebi ajab duniyaa kaa manzar dekhtaa huun nahin badlaav ke aasaar kuchh bhi abhi haalaat abtar dekhtaa huun muqaddar mein likhi viraaniyon mein zaraa saa rang bhar kar dekhtaa huun nazar aataa hai madfan khvaahishon kaa kabhi jab apne andar dekhtaa huun sunaa hai aag hai us kaa saraapaa chalo baahon mein bhar kar dekhtaa huun basirat mujh mein hai 'naayaab' aisi main har qatre mein gauhar dekhtaa huun"

"harf se taasir lafzon se maani le gayaa jaate jaate vo miri jaadu-bayaani le gayaa us se thiin mansub jo yaadein suhaani le gayaa chhin kar mujh se sabhi apni nishaani le gayaa shaah-raah-e-zist par mujh ko akelaa chhoD kar jaane vaalaa mujh se lutf-e-zindagaani le gayaa mez par nanhaa saa ik kaaghaz kaa TukDaa chhoD kar zindagi ki har khushi vo naa-gahaani le gayaa ham udhar masruf the aur vaqt kaa sail-e-ravaan kyaa pataa kab chhin kar ham se javaani le gayaa muddaton se saakit-o-jaamid hai ye naayaab dil kaun is dariyaa ki maujon ki ravaani le gayaa"

"main ne koshish ki bahut lekin kahaan yakjaa huaa safha-e-hasti kaa shiraaza rahaa bikhraa huaa zehn ki khiDki khuli dil kaa daricha vaa huaa tab jahaan ke dard se rishta miraa gahraa huaa kyaa patta kab kaun us ki zad pe aa jaae kahaan vaqt ki raftaar se har shakhs hai sahmaa huaa kis ki yaad aai moattar ho rahe hain zehn-o-dil kis ki khushbu se hai saaraa pairahan mahkaa huaa peD ke niche shikaari jaal phailaae hue aur parinda shaakh par baiThaa Daraa sahmaa huaa do-qadam bhi ab tumhaare saath chalnaa thaa muhaal raah tum ne khud alag kar li chalo achchhaa huaa zindagi har zaaviye se dekhtaa huun main tujhe hai miri fikr-o-nazar kaa daaera phailaa huaa chhap gai paani mein apni chhab dikhaa kar jal-pari aaj phir 'naayaab' mere saath ik dhoka huaa"

"khud apne aap se ruThaa huaa huun samajhte hain vo main un se khafaa huun haqaaeq se churaa kar aankh apni main kin saayon ke pichhe bhaagtaa huun koi to raasta hogaa bataanaa tire dil tak pahunchnaa chaahtaa huun ba-zaahir hai hansi honTon pe mere magar andar se main TuuTaa huaa huun jahaan khud ko muqaffal kar rakhaa thaa main us kamre ki chaabi kho chukaa huun ye kis ne mujh ko bas mein kar liyaa hai ishaaron par main kis ke chal rahaa huun agarche haal hai taarik meraa sitaara aane vaale vaqt kaa huun tapaa huun aatish-e-dauraan mein 'naayaab' to ab jaa kar kahin kundan banaa huun"

"junun shauq yaqin zaabte se aai hai uDaan mujh mein mire hausle se aai hai mujhe bhi to kabhi bainassutur mein rakhtaa phir aaj ek sadaa haashiye se aai hai bhulaanaa jab kabhi chaahaa hai main ne maazi ko nikal ke yaad tiri haafize se aai hai jise khayaal kaa markaz kabhi banaayaa thaa sunahri dhuup usi daaere se aai hai yaqin kar lo to aaeinge sab nazar apne tumhaare dil mein kaji vaahime se aai hai kiyaa hai main ne khud apnaa muhaasba aksar tamiz mujh mein isi tajrabe se aai hai jo main ne soch kaa badlaa hai zaaviya 'naayaab' har ek chiiz nazar qaaede se aai hai"

"jab se aayaa huun tere gaanv mein rang hi rang hain fazaaon mein aa ki dukh sukh ki koi baat karein baiTh kar shishamon ki chhaanv mein main bhi kartaa huun zabt ki koshish to bhi takhfif kar adaaon mein vo tiraa dafatan bichhaD jaanaa vo miraa dekhnaa khalaaon mein ho agar koi gosh-bar-aavaaz ik khamoshi bhi hai sadaaon mein yahi mere liye ghanimat hai saans le luun khuli fazaaon mein"

"isi futur mein karb-o-balaa se lipTe hue tamaam umr ganvaa di anaa se lipTe hue abhi bhi mil na saki in ki khaamushi ko zabaan ye log ab bhi hain saut-o-sadaa se lipTe hue havaa ke shahr mein bas saans lene aate hain vagarna ahl-e-zamin hain khalaa se lipTe hue har ek samt lagaa hai khamoshiyon kaa hujum ye kaun log hain koh-e-nidaa se lipTe hue hansi bhi aati hai in par taras bhi aataa hai ye nafraton ke pujaari khudaa se lipTe hue ham ibtidaa hi mein pahunche the intihaa ko kabhi ab intihaa mein bhi hain ibtidaa se lipTe hue main zindagi ke masaail se laDnaa chaahtaa huun magar vo haath nigaar-e-hinaa se lipTe hue vagarna khatm na hotaa gahan kabhi 'aazar' andhere khauf-zada the ziyaa se lipTe hue"

"dekho ye us kaa dekhnaa dekhe se aaegaa aur phir jo dekh loge to dekhaa na jaaegaa ye aisi manzilein hain ki rasta nahin koi saamaan baandh loge to rasta bulaaegaa be-dast-o-paa thaa shab main tiri yaad ke sabab itnaa ki lag rahaa thaa ki tu chhuT jaaegaa kho hi gai zabaan khamoshi ke darmiyaan sahraa mein koi shor bhi kab tak machaaegaa 'aamir' tujhe pataa hi nahin asliyat hai kyaa lekin ye khvaab mein bhi safar kaT hi jaaegaa"

"mujhi se puchh rahaa thaa miraa pataa koi buton ke shahr mein maujud thaa khudaa koi khamoshiyon ki chaTaanon ko toDne ke liye kisi ke paas nahin tisha-e-sadaa koi darakht haath uThaa kar salaam karte the mire junun kaa mubaarak thaa marhala koi samajh sakaa na magar koi pattharon ki zabaan har ek lamha lagaa boltaa huaa koi ye band lab hain ki koi khuli hui si kitaab mire savaal pe is dam to boltaa koi varaq pe raat ke likkhi hai subh ki tahrir ye ek vaqt hai be-rang-o-nur saa koi na harf harf huaa aks-e-guftugu meraa samajhnaa chaaho to le aao aaina koi ik aansuon kaa samundar thaa jal-pari kaa libaas milaa to aise milaa paikar-e-vafaa koi har ek zehn mein apne hi band hai 'maajid' fazaa ke khol se baahar hai raasta koi"

"tire bichhaDne kaa dukh apne khaandaan kaa dukh hamaari zaat ko hai saare kaarvaan kaa dukh huzur aap ko to 'ilm hai haqiqat kaa huzur aap to sunte the be-zabaan kaa dukh khamosh baiTh ke ik dusre ko sunte hain za'if peD samajhtaa hai naujavaan kaa dukh safar tavil hai aur zaad-e-raah bhi kam hai lagaa huaa hai mujhe nam-zada makaan kaa dukh safar mein tu hai magar paanv thak rahe hain mire thakaa rahaa hai mujhe yuun tiri thakaan kaa dukh kaniz-e-khaas banaa di gai thi shahzaadi use diyaa bhi gayaa to usi ki shaan kaa dukh gharib ke liye to dukh hi dukh hain duniyaa mein kabhi makaan kaa dukh hai kabhi dukaan kaa dukh nahin hai kuchh bhi yahaan is hisaar se baahar kahin khamoshi kaa gham hai kahin bayaan kaa dukh"

"vo bigDe hain ruke baiThe hain jhunjlaate hain laDte hain kabhi ham joDte hain haath gaahe paanv paDte hain gae hain hosh aise gar kahin jaane ko uThtaa huun to jaataa huun idhar ko aur udhar ko paanv paDte hain hamaaraa le ke dil kyaa ek bosa bhi nahin deinge vo yuun dil mein to raazi hain magar zaahir jhagaDte hain jo tum ko ik shikaayat hai to mujh ko laakh shikve hain lo aao mil bhi jaao ye kahin qisse nabaDte hain udhar vo aur aaina hai aur kaakul banaanaa hai idhar vahm aur khaamoshi hai aur dil mein bigaDte hain yahaan to sab hamaari jaan ko naaseh ban ke aate hain vahaan jaate hue dil chhuTte hain dam ukhaDte hain na dil mein ghar na jaa mahfil mein yaan bhi baiThnaa mushkil tire kuche mein ab zaalim kab apne paanv gaDte hain sahar ko rouun yaa un ko manaaun dil ko yaa rokun ye qismat vaade ki shab jhagDe sau sau aan paDte hain kabhi jhiDki kabhi gaali kabhi kuchh hai kabhi kuchh hai bane kyuun kar ki sau sau baar ik dam mein bigaDte hain 'nizaam' un ki khamoshi mein bhi sadhaa lutf hain lekin jo baatein karte hain to munh se goyaa phuul jhaDte hain"